Longa et calida aestas

Despois da longa et calida aestas que distrutamos este ano na Gallaecia (ou quizais sería mellor dicir callida aestas, porque acaba así, sen avisar...), chega puntual o mes de setembro, onde volvo experimentar a miña mutación habitual.

Velaquí os datos deste novo curso  2013/14 que empezou onte no MGB da Estrada. Somos o mesmo número de profes que o ano pasado, aínda que houbo un lixeiro repunte da matrícula. 19 horas lectivas para min, distribuídas do seguinte xeito:

• 3 horas de latín de 4 ESO (9 alumnos)
• 4 horas de latín 1BAC (10 alumnos)
• 4 horas de grego 1BAC (7 alumnos)
• 4 horas de latín 2BAC (11 alumnos)
• 4 horas de TIC 1BAC (18 alumnos)

En liñas xerais podemos dicir que case repetimos o número de "alumnos clásicos" do curso anterior. Só uns poucos menos. Pero, nos tempos que corren, haberá que darse por satisfeito por manter todos os grupos de Latín e o grupo de Grego de 1BAC que rescatamos o ano pasado.

Hoxe tocou preparar o noso espazo na rede: as carpetas compartidas en Google Drive, os cadernos de Evernote, os perfís da Aula Virtual, os permisos de edición na web Hélade. 

Inmersos como estamos no proxecto Dives Gallaecia 2012, non nos poñemos data para rematalo, por moito que figure no título. Que dure, que non acabe nunca.

Este outono queremos visitar o museo do castelo de Santo Antón da Coruña e a vila romana de Cambre. En febreiro espera Odisea 2014 e en marzo o festival de teatro de Lugo.

No comezo de curso albiscamos unha nova folga xeral no ensino e o probable mantemento da situación actual das Clásicas na seguinte reforma educativa. Unha de cal e outra de area, aínda que a estas alturas sigo sen saber moi ben cal é a cal e cal a area.

* Illa de Rúa, ría de Arousa. Imaxe de DivesGallaecia en Flickr